تجميل

تجربتي لـ سيروم فيتامين سي العضوي

10:09 ص


مرحبا
تدوينة اليوم عن سيروم فيتامين سي العضوي وتجربتي له
بالبداية بتكلم عن المنتج حسب اللي مكتوب عليه واللي مذكور بأمازون (اشتريته منه)

محتوياته : 
  • يحتوي على 20% من سيروم فيتامين سي ويحتوي  أيضا على فيتامين A , E
  • يحتوي على حمض الهالرونيك اسيد وهذا الحمض عنده قدرة هائلة على امتصاص الماء، بحيث يمتصه ثم يحبسه ويثبته في البشرة ثم يعيد توزيعه حسب الحاجة  ولذلك يعتبر مرطب فعال جدا وممتاز لتخفيف التجاعيد ومحاربة الشيخوخة.
  • محتوياته نباتية وعضوية خالي من الكحول و البارابين وغير مختبر على الحيوانات
  • يساعد على محاربة الشوارد الحرة وعلامات الشيخوخة لاحتوائه على مضادات الأكسدة
  • يعد بالحصول على بشرة صافية وناعمة و التقليل من حجم وعمق التجاعيد خاصة حول العين
  • مصنع في أمريكا وموافق عليه من هيئة الغذاء والدواء الأمريكية.

طريقة استخدامه:
وضع كمية بسيطة على بشرة نظيفة ووضع مرطب جيد بعده ، يمكن استخدامه يوميا ويمكن استخدامه قبل المكياج.

تجربتي معاه:
أول شي نوع بشرتي مختلطه وسبب استخدامي له للحصول على النضارة مو لمشكلة معينة يعني بس حبيت أجرب شي جديد في روتيني للعناية
استخدمته لفترة 3 شهور تقريبا بس بصراحه مو بانتظام 100% هههههه يمكن 70%
طريقتي يوميا قبل النوم وبعد ما أنظف بشرتي تماما وأشيل أي بقاي مكياج أحط منه نقط، المنتج يجي معاه زي القطرة عشان تستخدميها لما تجي تحطي منه، (مكتوب على المنتج أنه تحطي كمية بسيطة بس ماحددوا كم بالضبط ) أنا أحط نقطة وحدة لكل جزء من وجهي وبعدين أوزعها يعني نقطة للجبهة وأوزعها وبعدها نقطة للخد الأيمن واوزعها وكذا... لأن السيروم سايل فما يمدي تحطي لكل الوجه وبعدين توزعي غير كذا ينشف وبسرعة تتشربه البشرة، تقريبا 4أو 5 نقاط تكفيني للوجه ونقطتين للرقبة، وأخليه شويه ينشف وتتشربه البشرة وبعدها أحط كريم مرطب طبي من سيتافيل  ضروري الترطيب بعده.
نصيحة: برأيي أفضل شي يستخدم بعد السيروم هو كريم طبي عادي الغرض منه الترطيب فقط يعني مايكون فيه مواد ثانية تفتح أو تحتوي على أحماض او غيره لأن أنتي خلاص حطيتي سيروم فلو حطيتي كريم فيه هذي الأشياء بيكون كثير على البشرة وممكن تتهيج.

نتايجه: حبيت نتايجه كثير أول شي لاحظته أنه أعطاني ترطيب ونضارة وحسيته يخلي البشرة مشدودة ومليانة (تعرفوا لما تجلسين فترة تاكلين كويس وتنامين بدري كيف يصير وجهك  نفس التأثير)
لاحظت بعد فترة تفتيح للبشرة طبعا أقصد التفتيح الطبيعي مو شي مبالغ ولاحظت فيه يخفف اثار حب الشباب (خاصة اللي تجي بالبيريود) ويخليها تروح بسرعة، ولو فيه أي مناطق فيها تصبغات يخففها لك مع الاستمرار
بالنسبة للتجاعيد ماعندي فما أقدر أحكم عليه بس شفت مدح كثير عليه من الأجانب وصور قبل وبعد
ملاحظة: زي ماحنا عارفين أن فيتامين سي بشكل عام قابل للأكسدة عشان كذا المنتج في علبة لونها غامق والمفروض عشان تحافظين عليه مايتغير دايما تخلينه داخل كرتونه في مكان مظلم وبارد بعيد عن الضوء والحرارة.

مميزاته:
استخدامه سهل ونتايجه حلوة مع الاستمرار
سعره حلو (60 ريال تقريبا) وكميته تكفي لـ 4 شهور أو أكثر
مكان الشراء: أمازون هنا
سلبياته:
ماله سلبيات بس زي ماقلت المنتج قابل للأكسدة ولاحظت هذا الشي فيه أنه بعد فترة تغير لونه صار أغمق (لأني أحيانا انساه برا)  بس مو متأكدة إذا هذا الشي بيقلل فاعليته أو لا

هل أنصح فيه؟
أنصح أنه يكون ضمن روتين يومي يعني لو أنتي مهتمة ببشرتك وتبغين شي يعطيك نتايج أفضل، أما لو ماكنتي من الناس اللي تحب تلتزم بروتين معين فما أعتقد بيفيدك لأن نتايجه ماتجي من استخدام مره أو ثنتين.
 هل راح أشتريه مره ثانيه؟
هو عجبني بس حاليا فيه منتجات كثير لفيتامين سي وإذا خلصته أفكر أجرب شي جديد يكون مقارب لمواصفاته.

إن شاءالله استفدتوا من التدوينة
أشوفكم في تدوينات جايه ❤️




You Might Also Like

0 التعليقات